കാസര്ഗോഡ്: കൃഷിവകുപ്പിന്റെ ആദൂര് ഗാളിമുഖം കുണ്ടാറിലെ കശുമാവ് ഫാം പുറത്തിറക്കുന്ന ജൈവ കുരുമുളകും കുരുമുളകുപൊടിയും ഓണ്ലൈന് വിപണി രംഗത്ത് തരംഗമാകാന് ഒരുങ്ങുന്നു.
ഒരു തരത്തിലുമുള്ള രാസമരുന്നും ഉപയോഗിക്കാതെ പൂര്ണമായും ജൈവരീതിയില് കൃഷി ചെയ്ത ഉന്നത ഗുണനിലവാരമുള്ള രണ്ട് ഉത്പന്നങ്ങളും ആദ്യഘട്ടത്തില് ആമസോണ് വഴിയും തുടര്ന്ന് മറ്റ് ഓണ്ലൈന് പ്ലാറ്റ്ഫോമുകളിലൂടെയും വിപണിയിലെത്തിക്കും.
സംസ്ഥാന കൃഷിവകുപ്പ് നല്കുന്ന കേരള ഗ്രോ ബ്രാന്ഡിംഗോടെയാണ് കുരുമുളകും കുരുമുളക് പൊടിയും വിപണി കീഴടക്കാന് എത്തുന്നത്. ഇതിനൊപ്പം ജൈവ ഉത്പന്നങ്ങള്ക്ക് നല്കുന്ന ഓര്ഗാനിക് സര്ട്ടിഫിക്കേഷനും ലഭ്യമാക്കാനുള്ള നടപടികള് പുരോഗമിക്കുകയാണ്.
രണ്ടാഴ്ചയ്ക്കകം ഓണ്ലൈന് വിപണിയിലെത്തുന്ന ഉത്പന്നങ്ങള് നിലവില് കുണ്ടാറിലെ കശുമാവ് തോട്ടത്തില് നേരിട്ടും വില്ക്കുന്നുണ്ട്. 100 ഗ്രാം, 250 ഗ്രാം പായ്ക്കറ്റുകളിലാണ് കുരുമുളകും കുരുമുളക് പൊടിയും ലഭ്യമാകുക. ഫാമിന്റെ ഉത്പാദനവും മാനേജ്മെന്റും തൊഴിലാളികളെ നിയന്ത്രിക്കുന്നതും ആദൂര് ഗാളിമുഖ സബ് ഡിവിഷനിലെ ചുമതലയുള്ള കൃഷി ഓഫീസറായ വി.സൂരജ് ആണ്.
വില്പനയും വാങ്ങലും വികസന പദ്ധതികളുടെ നടപ്പിലാക്കലും കശുമാവ് വികസന ഓഫിസര് മനു നരേന്ദ്രന്റെ നേതൃത്വത്തിലാണ്. കൃഷിമന്ത്രാലയത്തിനു കീഴില് പ്രവര്ത്തിക്കുന്ന ഡയറക്ടറേറ്റ് ഓഫ് കാഷ്യുനട്ട് ആന്ഡ് കൊക്കോ ഡെവലപ്പ്മെന്റ് നല്കുന്ന സര്ട്ടിഫിക്കറ്റ് ഓഫ് അക്രഡിറ്റേഷന് കേരളത്തില് ആദ്യമായി ലഭിച്ച സര്ക്കാര് ഫാം എന്ന നേട്ടവും ഈ കശുമാവ് തോട്ടത്തിനുണ്ട്.
കഴിഞ്ഞവര്ഷം ഒരു കോടി രൂപയുടെ റിക്കാര്ഡ് വിറ്റുവരവാണ് ഫാമില് രേഖപ്പെടുത്തിയത്. സങ്കരയിനം കശുമാവിന് തൈകള്ക്കൊപ്പം കുരുമുളക്, ഒട്ടുമാവിന് തൈകള്, കുറിയ ഇനം തെങ്ങിന് തൈകള്, ഒട്ടുപ്ലാവ്, വിവിധയിനം നടീല് വസ്തുക്കള്, മുന്തിയയിനം ചക്ക, മാങ്ങ ഉള്പ്പെടെ വൈവിധ്യമാര്ന്ന കാര്ഷിക ഉത്പന്നങ്ങള് ഫാമില് ലഭ്യമാണ്.
E-paper LOGIN
LOGIN
